ក្រសួងធនធានទឹកអំពាវនាវឱ្យប្រុងប្រយ័ត្នពីបាតុភូតធម្មជាតិក្នុងអំឡុងថ្ងៃបុណ្យចូលឆ្នាំប្រពៃណីជាតិខាងមុខ
ភ្នំពេញ៖ ក្រសួងធនធានទឹក និងឧតុនិយម ចេញសេចក្តីជូនដំណឹងឱ្យប្រជាពលរដ្ឋបង្កើនការប្រុងប្រយ័ត្នចំពោះបាតុភូតធម្មជាតិដែលអាចកើតឡើងក្នុងអំឡុងពីថ្ងៃទី១៣ ដល់ថ្ងៃទី១៩ ខែមេសា ឆ្នាំ២០២២នេះ។ ពោលគឺអំឡុងថ្ងៃបុណ្យចូលឆ្នាំខ្មែរប្រពៃណីជាតិ។
នៅក្នុងសេចក្តីជូនដំណឹងនៅថ្ងៃទី១២ ខែមេសានេះ ក្រសួងធនធានទឹកបានអោយដឹងថា នៅថ្ងៃទី១៣ ដល់១៦ ខែមេសា ព្រះរាជាណាចក្រកម្ពុជានឹងទទួលឥទ្ធិពលពីជ្រលងសម្ពាធទាប (ឥណ្ឌា) ក្នុងកម្រិតពីខ្សោយទៅមធ្យម ប៉ះនិងសីតុណ្ហភាពផ្ទៃដីឡើងកំដៅ (ហប់) បង្កើតបានជាបាតុភូតទម៉ូឌីណាមិច (Thermodynamic)។ ដែលនឹងធ្វើឱ្យមានសីតុណ្ហភាពចន្លោះពី២៤ ដល់៣៧អង្សារសេ។
ក្រសួងក៏បញ្ជាក់ងផងដែរ៖ «ក្នុងចន្លោះពីថ្ងៃទី១៣-១៧ ខែមេសា អាចមានភ្លៀងក្នុងកម្រិតពីខ្សោយទៅច្រើន លាយឡំទៅដោយ ផ្គរ រន្ទះ និងខ្យល់កន្ត្រាក់»។
ចាប់ពីថ្ងៃទី១៧-១៩ ខែមេសា ស៊ីតណ្ហភាពអតិបរិមានិងភ្លៀងក៏នឹងចុះថមថយបន្តិចវិញ។
ក្រសួងធនធានទឹក និងឧតុនិយមស្នើដល់សាធារណជនជ្រាបជាព័ត៍មាន និងបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិដែលអាចកើតឡើងជាយថាហេតុ៕
